Dicette Adamo :
‘Eva ammore mio
appreparame ‘na pera!’
Eva ca è stata
sempe ‘nu pucurillo sorda
pe ‘vvia ‘e chill’incidente
ca avette cu ‘o serpente,
ca le vulette
‘nfelà ‘a cora
pure int»e recchie,
‘nce rette ‘na mela,
ed eccoci qua :
male cumbinat’,
prucchiuse
e mmuorte ‘e famme.

Eppure,
stanno a chelle
ca se dice,
putiemmo esse,
se nun fusse
succieso ‘o ‘qui pro quo’,
tutte quant’ rre,
cu ‘e sorde a scurmamiento
ca ce putivano
ascì pe dint’ ‘e recchie
e putiemmo esse
tutt’ banchieri
e ognuno ‘e nuie
putive tenè
tre cucchieri.

Maleritto chillu juorno!
Quanno Eva mettette
‘a recchia sorda annanzo
e cumbinaie ‘o guaio
‘mbriacanno ‘a pera
cu ‘a mela,
a canna
cu ‘a nutella,
‘e palle
cu ‘o callo,
‘o tarallo
cu ‘o casecavallo.
E nuie ex rre
ce murimme ‘e cancarella
sulo pecchè Adamo
vulette assaggià
‘a fella.

Al momento non ci sono commenti, lascia tu il primo!

© 2000 — 2022