‘O SELE

Guardo ‘a fotografia
d’o Sele,
sento
chillu sciummo
‘e parole
ca scorre
senza significà niente,
‘o crà crà ‘e ‘ste curnacchie
me ‘ncasina
e m’arrevota ‘a capa.
Me sento ‘e venì meno,
nun respiro,
‘ste ciavole
ca arrobbano
‘o vuccone
a cchi s’addorme
e i iuorn’ a Cristo
nun se fermano cchiù.

‘O Sele sembra
ca se mette
a scorrere ‘o veramente
e veco ll’acqua ca se move,
ca ‘ntozza ‘e prete e spumeggia,
me sembra ‘e sentì
l’addore d’o zurfo
d»o sciumm’
ca passa pe Cunturse
e de vedè ‘na trota
ca zompa distratta
p’acchiappà
‘na mosca,
nun tanto pe l’acchiappà
ma tanto pe zumpà.

Oie è iurnata ‘e stanca
e puro ‘o sciummo
c’ha visto
Etruschi,
Normanni,
Saracini,
Sucialist
e Cumunist’
è stanco!
E cuntinua
a fa ‘o stritto necessario :
spumeggia,
‘ntoppa ‘e prete
e murmureia,
pure isso è addeventato
n’abitudinario.
chissà, forse,
dimane
accuminciarrà
n’ata vota.
a campà.

Invia la poesia ‘O Sele di Gennaro Nunziante ad un Amico:
la tua e-mail:	la sua e-mail:
21/04/2021 — 06:39:29 — ip: 3.236.228.250

Vota la poesia ‘O Sele di Gennaro Nunziante:

5 4 3 2 1

I vostri commenti alla poesia: ‘O SELE

Al momento non ci sono commenti, lascia tu il primo!

Lascia un commento.

© 2000 — 2022